Dulusçuluq

Azərbaycan dulusçuluq ənənəsi zəngin təbii resurslara və minilliklər boyu formalaşmış sənətkarlıq təcrübəsinə əsaslanır. Dünyada mövcud olan 128 gil növündən 98-nin Azərbaycanda yayılması bu sahənin geniş inkişafına imkan yaratmışdır. Ölkənin müxtəlif bölgələrində aparılan arxeoloji tapıntılar keramika istehsalının Azərbaycanın ən qədim sənət sahələrindən biri olduğunu təsdiqləyir.

Dulusçuluq yalnız məişət əşyalarının hazırlanması ilə məhdudlaşmır, həm də gündəlik həyat və kulinariya ilə sıx bağlıdır. Azərbaycanın müxtəlif bölgələrində yeməklərin gil qablarda bişirilməsi ənənəsi bu sənətin praktik və mədəni əhəmiyyətini göstərir.Şəki mətbəxinin əsas nümunələrindən biri olan piti ənənəvi olaraq gil qablarda bişirilir. Gil qabların istiliyi bərabər paylama xüsusiyyəti yeməyin dad və keyfiyyətinə birbaşa təsir edir və bu səbəbdən bu ənənə bu gün də qorunub saxlanılır. 

Şəkinin tarixi keramika ənənələrini gələcək nəsillər üçün qoruyub saxlamaq və Azərbaycan gilini dünyaya tanıtmaq məqsədilə “ABAD” Keramika və Tətbiqi Sənət Mərkəzi yaradılmışdır. Bu qabaqcıl mərkəz Cənubi Qafqazda öz növünün ilk nümunəsidir. Bundan əlavə, 2021-ci ildən bəri Şəki Avropa Keramika Marşrutunun üzvü olmaqla öz zəngin keramika irsini bir daha nümayiş etdirir.