Nizami Gəncəvi Adına Milli Azərbaycan Ədəbiyyatı Muzeyi

Nizami Gəncəvinin adına Milli Azərbaycan Ədəbiyyatı Muzeyi 1939-cu ildə yaradılmışdır. Muzey 1945-ci ildə geniş ictimaiyyət üçün açılmış, 2009-cu ildə isə bina əsaslı şəkildə yenidən təmir olunmuşdur.

Muzeyin ekspozisiyası Azərbaycan ədəbiyyatının qədim dövrlərdən müasir dövrə qədər olan inkişaf mərhələləri haqqında məlumat verir. Burada görkəmli yazıçıların əlyazmaları, məşhur xəttatların kalliqrafiya nümunələri, klassik ədəbi əsərlərə çəkilmiş miniatürlər, Azərbaycan müəlliflərinin əsərləri, sənədli fotoşəkillər, xalq yaradıcılığı nümunələri, müxtəlif tarixi dövrlərə aid sikkələr, qədim xalçalar, keramika və tunc qablar, eləcə də maddi mədəniyyətin digər nümunələri nümayiş olunur.